Transcript

Transcript
 

f. 61r
 

S. Quator a nobis vno spem litteras accepi, omnes amoris
ac benevolentiae in me, affectuum in defunctum(1)
parentem plenissimas. Qui sane affectus tui, mihi 
quoque lacrymas subinde exprimunt, ex meo tuum 
animum aestimanti. Quod enim de litteris Cicero-
nis ad Atticum Nepos in huius vita testatur, non
esse difficile ex istis epistolis istius temporis hi-
storiam eruere, id de parentis ad te, et tuis 
vicissim ad ipsum litteris vere dici posset. Quid enim
tam arduum, tam occultum aut periculosum 
exstitit, cuius ille te, tu rursum illum non fecisti 
participem. Quae sane cogitatio iam in animo
meo gaudium, iam dolorem excitat. Et quia dig-
nus tibi visus sum, quanquam indignus, qui in ip-
sius locum succederem, operam semper daturus 
sum, ne mea vel culpa vel vaecordia amicitia 
illa vestra unquam intermoriatur. Quod vt filio quoque 
tuo serio iniungas, vere te rogo: Fratribus 
item meis, vt huc mecum conspirent, idem
scripturus sum. De Epitaphiis omnino tecum 
sentio: et habebitur delectus. Partem operis, per 
Surium missi, diligenter perlegi : et probaui omnia: 
et tibi non semel pro isthoc labore, diligentia 
et studio in id collatis, gratias dixi, dicturusque

(1) In margine:
1614
14 januarii

f.61v
 

sum, quandiu animus in hoc corpore est futurus.
Nam non modo ordine et dilucide pertractasti 
omnia, sed etiam tam apte, concinne, nervose 
docteque omnia aptasti et concinnasti, vt nullum non 
lectorem in tui amorem et admirationem sis 
tracturus. Idem quoque sentit Syndicus Alth., qui 
iuxta mecum legit omnia. Caeterum descriptio 
me nonnihil sollicitat. Gerlacus enim etsi 
lubenter huc suam operam est collaturus, quia 
tamen amanuensi caremus, et ipse quoque 
Latine non expedite scribat, ego contra ne-
minem hic habeam cui hanc rem ausim com-
mittere, cogitaui tutius me facturum, si, 
meo aere, totum opus per iuve-
nem a fide vobis notum isthic describendum 
curarem. Ita enim tu sine taedio descripta re-
legere, et scribentem posses dirigere in iis, 
qui alioqui haesitationem afferre possent. De 
qua re expectabo prius tuum iudicium. 
Ill. Domino comiti ad suas respondeo, et de 
nostris, aliisque prolixe eum erudio. Quia 
a. litteras ipsius dem. es traditurus, 
aut missurus per Sluiskium, quanquam mallem
te ad aulam ire, de istis verba non 

 

 f. 62r
 

faciam: sed te ad illas ablegabo. Ego rurssum 
nouos nobis motus praesagio. Dominus Hero heri do-
mum abiit. Gerlacus commode rediit, mihi ubique
commendatus. Pyrrhus tria vel quatuor ad me 
verba scripsit: ei respondeo, at de istis 
quae in literis, ne γρῦ quidem. Nonnulla enim 
in eo desidero; plura in Coniuge ipsius ad sor-
ditiem facta. Cum hospite optima mihi conuenit, 
quem amo et colo: nec caussam habeo secus 
cur faciam aut cogitem. Ritzius se multis apud 
me modis insinuat: et communicat mecum multa 
ad vocationem ministrorum pertinentia. Dan: 
iam palam primatum cum domo affectat. De or-
dine pauperum a parente invecto et excogitato
dici adhuc commode potest in operis fine. Dig-
num enim id, meo iudicio, quod bene notetur. 
De editione post, inter nos sumus acturi. 
Eppius hic fuit apud nos: et recessit heri. Jupi-
ter duas iam habet vterum ferentes: sed prae-
ter has lupas plurimas: nullis se non nunc 
peccatis conspurcans; etiam illis (ut dicitur) ob quae Troia 
eversa. Epitaphiorum librum ad Conderum
mittes, ubi eum percurreris. Eibonis contro-
versiae cum Dodone comes se miscet, stans 

f. 62v
 

potissime ab istius partibus. Dedit isthoc nomine 
satis aculeatas ad parentem litteras Wilh. Cniphu-
sium. Verum ille tam caecus, et in nos tanto 
odio fertur, vt comitem non videat, sed ad
nutum istius potius se suaque componat. O 
miserum! Visio valde nuper accidit: de som-
nio necdum habeo compertum, an vetus sit, 
an vero nouum. Res Brunsuicensium maxi-
me me terrent. Et haec quoque res nostrum 
exstimulat, quamobrem praesidium exaucto-
ratum cupiat. Haec dum scribo cursor
superuenit, ac has a syndico mihi affert, 
Marienhovae sub meridiem scriptas. Eas 
legendas tibi mitto. Hagam quanquam 
scribere cum hoc tabellario in animum in-
duxeram, malo tamen nunc Comitiorum 
expectare exitum, quam incerta pro certis 
perscribere. Patriae me miseret. Habes 
responsum ad litteras, si non bonum, saltem 
longum ad satietatem. Uxor et liberi ex 
nobis salveant. Coniux et Gerlacus salvere 
vos optant. Vale, mi Domine, et signifi-
ca quousque sit Typographus Leidensis in editione 
operis progressus, Item an typus, an forma
an charta placeant? Raptiss. vt vides,
14. Jan. 1614. Festinat. in scribendo apud
Illust. D. excusa: et saluta Sluiskium.
Me nosti [etc.]

f. 63r
 

S. Iam fasciculum obsignaram, cum tuae 
XI huius scriptae, ad me perferuntur. 
Adiunctas statim per Gerlacum curaui. 
Eppianas fratri Basilio curandas dedi. 
Ad Rufum etsi scripsi iam ante, vti vi-
debis, tamen a te excitus nouas ad 
eundem do, id continentes tantum 
quod tu scribere me suades. De 
servitute bene tu iudicas: prudenter 
Gubernator: cui respondi. Tu 
facies, quod petii. Si postrema
ad parentem pertinentia reperire non 
potes, ego operam daturus sum, ut a 
nobis summatim habeas, quod alias pro-
lixe habuisti. Caetera ex litteris prioribus. 
Rursum Vale cum tuis quos saluto.
Datum vt supra.

f. 63v
 

Clarissimo Domino
Vb: Emmio
amico optimo et
Colendissimo.

Accepi 16 Ianuarii
1614

f. 64v
 

Clarissimo et praestan-
tissimo viro, Domino 
Vbboni Emmio, Histo-
rico ac Historiarum
Professori apud Groning.
Eximio, amico suo 
summe diligendo et 
obseruando etc.
 

Accepi 16 Ianuarii 1614
 

Com. Enno se miscet causae quae est 
inter Eibonem & Tidonem Cnyph. fa-
uens Eiboni.
 

Dat hac de re aculeatas
literas ad patrem Tidonis
Guilhelmum Cnyphu[m].