Transcript

Transcript

f.40r

Gewisse vnd sekere tidinge hebbe wy hyr, dat die Oestfriesche
Cantzler Frantzius den 24 Martii stilo uetere van Prage entlick wedder
tho Aurick angekomen sy, vnd hebbe beneffens etlike strenge Keiserlike mandaten
siue clausula, ock einen Keis. herolt medegebrocht, vnd noch einen
Keis. Commissarium, Nutzel genant, tho Magdeborch vnder wegen gelaten,
de ock also balde söle navolgen. Der Mandaten inholt söle
wesen, dat de concordaten van Keis. Maiestaet nu confirmeert, als ock
des Auriker Landages abscheit vullenkomen geholden, vnd daetlick
thor executien gestellet werden: dat ock de gantze Regeh-
ringe reformeert vnd vp einen gewisser voet gebrocht werde.
So men der Keis. Maiestaet werde hyrin gehoersam leisten, söle graeff
Johan de soldaten, so itzund in Oestfrieslant syn, also balde na Vngern
varen, wo averst nicht, sole dorch desulve aldaer in Oestfrieslant
de executie der Mandaten gedaen werden. Vnd sole de krych in namen
van Keis. Maiest. darsulvest gevöret werden, Graeff Enne sole dar-
van de Overste Velthovetman syn, Syn broder Gr. Gustavus,
item Graeff Johan, de beide brödern van Knyphusen, der Juncker
van Risum, Oertgise van Weersebe droste vp den Oert, Hane droste
up Stickhusen, Hans Brunswyck, droste vp de Freborch, Adrian
ein hopman vth Brabant gekomen, hopluden wesen. De Ruterye
sol van Frantz Frydach tho Godens gevöret werden, vnd solen
de vendelen boven dre hundert coppen hebben. De Lutinanten
sölen wolgeoeffnede, vnd der saken sehr thogedane mannen wesen
de dat werck solen verrichten. Ock is den Junckern vp
die negeste dorper vm Emden als tho Vphusen, Petkum, Borsum,
Vphusen angesecht, sie solen voer den soldaten logys verdich
maken. Summa alle ding is gerichtet vm Emden tho benauwen
und durch ein vplöp vnder de borgerye die stadt in subiectie tho
bringen. Darhen dan gerichtet is, dat de Graeff voer vnd
na sick hefft horen, vnd der borgerschup denuncieren laten, men söle
etlike Moitemakers, als he se nömet, vth der stadt verwisen,
als dan wil he sick wol mit de Reste genedich verdragen, Item de
wacht ordeninge vnd ander dergelycken dingen varen laten. Item
dar hen gehöret, dat die droste vnd amptman vp den Oert, tho einen
loffwerdigen inwoner des Vlecks Lehr voer weinich dagen gesecht
mit runden woerden, de Graeff gedochte na sinen gevallen heerschen
alsulde he darumme alle sine vnderdanen tho lande vthdriven: wulde
dussen Sommer kröpel offt koning werden.

f.40v

Idt sint ock gesanten van den H. Graven an den Hern generäl Staten
deputeret, der herr van Knijphusen vnd Dotias Wiarda gewesene Emder
Syndicus, dewelcke sulden al vp die Reise gewesen syn, so nicht
de Cantzeler vnderdes tho huis wehre gekomen. Solen overst
erstes dages reisen. Deren petitie sal syn, dewile
de graeff mit syn eigen vnderdanen tho doen hadde, daer tho ehm dat
recht vnd die noet dreve, dat de hern Staten, als den de sake
nicht anging, als gude neutrale naburen sick daer in nicht wulden
steken, vnd sine Rebelle vnderdanen nehne hulpe leisten. Vnd
verhopet S. Gn. datsulve lichtlick tho erholden, vnd lett sick
vaken hören, he hebbe sine sake also mit den hern Staten compareret,
dat he in sulcken attentaten off auflegen gantz nichtes van sie sick hebbe tho
befruchten, vnd dat sine vndersaten nehne troest van denselven hebben
tho verwachten etc.