Transcript

Transcript

f.38r

Geue ick vnderbenente oetmödich tho verstaen. Wo tho der
tydt, do dat klooster hoff bauen myn vermöden daetlick ange-
tastet worde, mij van den domaels Regehrenden Heren vp mijne
billike klage vnd deduction der inconuenienten, so vth de betim-
meringe des houes so woll der scholen, als miner vnd mines
collegae behusinge, vnd sunst anders erstaen sulden, is thogesecht
vnd gewisslick belauet, voer eersten, dat die betimmeringe thor
minsten vngelegenheit der scholen, ia ock tho der scholen verbeteringe,
(welckes ick doch woll verstunde nicht mögelick tho syn) sulde ver-
richtet werden: Thom andern, dat men vns gegen verla-
tinge des haues wedder sulde in andere wegen accomoderen, der-
maten, dat wij nene billike klage des angaende sulden hebben
könen: Thom drudden, diewile myn studierkamer notoir
dorch disse veranderinge vnduchtich vnd genoechsam vnbruicklick
muste gemaket werden, dat men mij alsobalde vnd ane vertoch eer
vnd bevoer dat die dorchgang dorch datt hoff den gemehnen man
sulde vergunnet vnd eropenet werden, vmme mij van myn studie-
ren nicht tho priueren, ein ander Musaeum edder studierkamer
daer idt mij vpt bequehmste muchte sijn, neffens andere noetwendige
verbeteringe miner behuisinge vp der stadts kosten sulde erbouwen.
Nu iss idt auerst an deme, dat in die beschenen belofften
gantz bauen verhapen noch bet tho desser tydt veele stucken na geble-
uen sint, die schole in sehr grote inconuenienten besteken blifft,
insonderheit ick nu langer als anderhalff iaer den gebruick
mines Musaei nicht ahne groet verdriet, ock wel vaken mit enige
vnverdult hebbe missen moten. Derwegen ick dan
itzundes dorch die noet gedrungen wesende, an I.E.E.H.W. oet-
modich versöke, dat hyr in nunc saltem enige wercklike vorsehunge
möge gedaen werden, darmit wij thor genetinge der gedanen billiken
belofften na lange genamene patientie entlick einmael sulden mögen
geraken. Sulks doende etc