S.P. Consternatus sum uehementer nobiliss. & Ampliss. uir, cum primum generatim quaedam de iis quae Haga in negocio patriae meae uobiscum tulistis ex nobilissimo fratre tuo, deinde multo adhuc magis, cum pleniora & accuratiora ex ipsa epistola illustrium Ordinum nostrorum ad eos qui mandato suorum patriae res hoc tempore curant & ad ciuitatem Emd. scripta cognoui. De quib. scribere ad Ampl. tuam aliquoties quidem conatus sum, sed prae doloris magnitudine torpescente mente in ipso conatu defeci. Nec nunc quicquam aliud scribere possum quam miserari me hanc patriae fortunam tam & indig nam & infelicem, saepeque nunc recordari rerum, quae aliquot ante menses dolens & gemens ad eandem Ampl. tuam perscripsi. O potens gratia, omnia peruertens. Caetera nosti. Ingemisco & finio, ne cogitationib. his dolorificis memet affligam. Vale & dolorem fatenti ignosce. Raptim 1610.
